У рамках рэспубліканскай акцыі “Адзіны дзень бяспекі” рабятам на гадзіне інфармацыі “Памятайце, дзеці, на вуліцы пра гэта!” нагадалі аб правілах бяспекі на вуліцы і правялі гульню “Пешаходны пераход”.

Штогод у першую нядзелю верасня ў Беларусі ладзіцца Дзень беларускага пісьменства – урачыстасць у гонар знакамітых асветнікаў, дзяржаўных і рэлігійных дзеячаў, якія заклалі падмурак беларускай адукацыі і пісьменства. Супрацоўнікі філіяла “Лідская гарадская дзіцячая бібліятэка” ладзяць разнастайныя мерапрыемствы, прысвечаныя развіццю беларускага пісьменства і друку, знаёмяць з творамі класікаў і сучасных беларускіх аўтараў, творамі пісьменнікаў-землякоў, з навуковымі, энцыклапедычнымі, даведкавымі і мастацкімі выданнямі па гісторыі і культуры Беларусі.
Так, да ўвагі чытачоў быў арганізаваны адкрыты прагляд літаратуры “Словы пісьменнікаў – скарб народа”, прысвечаны песнярам беларускай зямлі – Янке Купале і Якубу Коласу.
Бібліятэчны ўрок “Беларускае пісьменства: ад Скарыны да сучаснасці” быў падрыхтаваны для вучняў 4-х классаў ДУА “СШ № 1 г. Ліды”. Дзеці даведаліся пра багатую гістарычную спадчыну нашай краіны. Іх пазнаёмілі з імёнамі людзей, якія ўнеслі вялікі ўклад у развіццё беларускага слова, друку і пісьменства. Францыск Скарына і Мікола Гусоўскі, Еўфрасіння Полацкая і Кірыла Тураўскі, Сімяон Полацкі і Сымон Будны, Янка Купала і Якуб Колас і многія іншыя выдатныя асобы… У канцы мерапрыемства рабятам пажадалі імкнуцца жыць так, каб імі таксама ганарылася краіна.
Незвычайны літаратурны рэбус “Творцы кніжнага слова” наведалі навучэнцы 6-га класа ДУА “Першамайская сярэдняя школа”, з дапамогай якога ўспомнілі родную мову, імёны і творы пісьменнікаў, якія пакінулі пасля сябе літаратурную спадчыну, даведаліся аб першых асветніках Беларусі і праглядзелі відэа-ролік пра развіццё беларускага пісьменства і друку.

Філіял “Бярозаўская гарадская бібліятэка” запрасіў вучняў 4 класаў на паэтычную гадзіну “Максім Танк – паэт магутнага паэтычнага таленту”, прымеркаваную да 110-годдзя з дня нараджэння беларускага пісьменніка. Вучні пазнаёміліся з жыццёвым і творчым шляхам паэта, чыталі вершы, паглядзелі прэзентацыю “Рэкі смутку і радасці Я пераходзіў не раз”.

У філіяле “Лідская гарадская бібліятэка № 6 імя В. Таўлая” быў праведены ўрок духоўнасці “Шлях друкаванага слова”. Ішла гаворка аб складаным шляху, які прайшла кніга ад вытокаў да нашых дзён, ад папіруса да электроннай кнігі. Запрошаныя дзеці папоўнілі свае веды аб выдатных беларускіх асветніках, першадрукарах і вучоных, дзеячах беларускай, славянскай і сусветнай культуры.

Напярэдадні Свята беларускага пісьменства супрацоўнікі філіяла “Лідская гарадская бібліятэка № 1” запрасілі да сябе навучэнцаў ДУА “СШ № 1 г. Ліда”.
Спачатку вучні сталі ўдзельнікамі слайд-вандроўкі “Ад вузельчыка да алфавіта: гісторыя пісьменства на Беларусі”, падчас якой яны даведаліся, што дадзенае свята аб’ядноўвае тых, хто з вялікай павагай ставіцца да роднага слова, духоўных здабыткаў нашага народа, нацыянальнай культуры, асветы і літаратуры.
Другая частка мерапрыемства пад назвай “Галасы з даўніх вякоў…” дала магчымасць школьнікам атрымаць звесткі аб выдатных асветніках Беларусі: Францыску Скарыне, Сымоне Будным, Кірыле Тураўскім, Сімяоне Полацкім, даведацца аб жыцці і дзейнасці прападобнай Еўфрасінні Полацкай.
І, нарэшце, трэцяя частка – гэта сустрэча з паэтам Канстанцінам Іосіфавічам Якубчыкам, які нарадзіўся, жыве і працуе ў нашым родным горадзе Ліда. Канстацін Іосіфавіч з вялікім задавальненнем піша вершы для дзяцей, шмат якіх надрукавана ў дзіцячым часопісе “Вясёлка”. На сустрэчы паэт чытаў свае вершы, адказваў на пытанні прысутных, а таксама падзяліўся сваёй задумкай – некаторыя свае вершы пакласці на музыку. На заканчэнне прысутныя пажадалі Якубчыку Канстанціну Іосіфавічу творчых поспехаў.

2 верасня ў філіяле «Лідская гарадская бібліятэка № 4» бібліятэкары ладзілі бібліяграфічны агляд «Слова кніжцы беларускай». З кніг, прадстаўленых на выставе, дзеці даведаліся пра значэнне азбукі ў асвеце і праваслаўі. Цікавасць у навучэнцаў выклікаў экскурс у гісторыю ўзнікнення кнігі, кнігадрукавання і славянскага алфавіту. Вялікая ўвага была нададзена складальнікам першага алфавіту – братам Кірылу і Мяфодзію. У канцы бібліятэкары заклікалі маладое пакаленне да павагі і разуменню сваёй культуры і традыцый.

1 верасня ў Беларусі адзначаецца Дзень ведаў. Для тых, хто ідзе ў школу ўпершыню, гэты дзень асаблівы – гэта свята Першага званка. Для першакласнікаў усё першае: першы партфель, першы падручнік, першы букет першай настаўніцы. А таксама першае знаёмства з бібліятэкай. Так, у гэты дзень бібліятэкар філіяла “Інтэгараваная бібліятэка агр. Тарнова” запрасіў вучняў першага класа мясцовай шклолы на азнаямляльна-пазнавальную экскурсію “Першае знаёмства з бібліятэкай”. Маленькія наведвальнікі пазнаёміліся з правіламі карыстання бібліятэкай, зносінамі з кнігай. І атрымалі наказ сябраваць з бібліятэкай, бо наведванне бібліятэкі вучнямі пачатковых класаў значна ўплые на тое, як у далейшым дзеці будуць наведваць кніжны храм і, наогул, – чытаць.