Обзор мероприятий., Обзор мероприятий, проведенных Лидской районной библиотекой и филиалам Опции

[Admin]

Літаратурная вечарына “Роднаму слову прызнанне ў любові”

Да Міжнароднага дня роднай мовы 20 лютага прайшла літаратурная вечарына “Роднаму слову прызнанне ў любові” у філіале “Тарноўская сельская бібліятэка”. Мерапрыемства наведалі вучні мясцовай школы і дзеці старэйшай групы дзіцячага сада. Прысутныя прыйшлі да высновы, што неабходна шанаваць сваю мову, песні, казкі, звычаі, таму што ўсё гэта з’яўляецца спадчынай дзядоў і вялікім нацыянальным скарбам. Да мерапрыемства была падрыхтавана кніжная выстава, дзе супрацоўнік філіяла прадставіў літаратуру пра беларускую мову і на беларускай мове.

[Admin]

Пазнавальная сцяжынка “Чаму знікаюць словы?”

20 лютага ў рамках дзіцячага клуба “Буслік” філіяла “Лідская гарадская бібліятэка № 2” прайшла пазнавальная сцяжынка “Чаму знікаюць словы?”, прымеркаваная да Міжнароднага дня роднай мовы. Дзеці не толькі дазналіся, якая багатая, прыгожая, мілагучная і самабытная беларуская мова праз творы беларускіх пісьменнікаў, але і ў гульнёвай форме здолелі паказаць свае веды і моўную эрудыцыю, паспяхова выканаўшы заданні-конкурсы “Слова трапнае і дасціпнае”, “Папацей грамацей”, “Прырода роднага краю” і іншыя.

[Admin]

“ДАРОСЛЫЯ – ДЗЕЦЯМ”

19 лютага ў Лідскай раённай бібліятэцы імя Янкі Купалы адбылася ўрачыстая цырымонія адкрыцця IV адкрытага рэгіянальнага літаратурнага конкурсу імя Веры Навіцкай “Дарослыя – дзецям”.
Дадзены конкурс стаў яшчэ адной лідскай культурнай традыцыяй – ладзіцца ён раз у два гады. Арганізатарам конкурсу выступае дзяржаўная ўстанова культуры “Лідская раённая бібліятэка імя Янкі Купалы”.
Вера Сяргееўна Навіцкая – аўтар некалькіх дзіцячых кніг прозы пра дзяўчынак-гімназістак, якая ўзначальвала з 1910 года “Лідскую прыватную жаночую гімназію Ф.Л. і В.С. Навіцкіх”. Творчая спадчына Навіцкай – яскравы прыклад плённай працы на ніве выхавання і адукацыі юнага пакалення.
Конкурс арганізаваны з мэтай выяўлення, падтрымкі і заахвочвання лідскіх паэтаў і празаікаў да напісання твораў для дзяцей. У 2020 годзе конкурс праходзіць з 3 лютага па 5 снежня ў дзвюх намінацыях: “Паэзія” і “Проза”.
Якасна арганізаваная праграма мерапрыемства не пакінула абыякавымі нікога з прысутных. Удзельнікамі мерапрыемства сталі члены літаратурнага аб’яднання “Суквецце” пры рэдакцыі “Лідская газета”. З уступным словам выступіў лідскі краязнаўца Станіслаў Вацлававіч Суднік, пазнавальным аказаўся і яго кароткі агляд жыццёвага і творчага шляху лідскай пісьменніцы.
Перад прысутнымі літаратарамі выступіла Велесевіч Таццяна Пятроўна, загадчык бібліятэкі ДУА “Сярэдняя школа № 16 г. Ліды”, кіраўнік абласнога рэсурснага цэнтра. Сумеснымі намаганнямі бібліятэкі і школы былі надрукаваны сем кніг Веры Навіцкай: тэтралогія пра жыццё Марусі Старабельскай “Добра жыць на свеце” – “Вясёлыя будні”, “Ціхамірныя гады”, “Першыя мроі”; аповесці для юнацтва. Таксама была створана віртуальная кніжная выстава-дасье “Ліда, падзеленая на гады”, у якой змешчаны біяграфія аўтара, вокладкі кніг, бібліяграфічнае апісанне прыжыццёвых выданняў, а таксама Qr-коды, зпампаваўшы якія, можна прачытаць усе кнігі аўтара.
Удзельнікі мерапрыемства з дапамогай вядучых Курбыка Галіны і Мацулевіча Аляксандра ўспомнілі гісторыю конкурсу, якая пачынаецца з 2014 года, і пазнаёміліся з асноўнымі патрабаваннямі, якія прад’яўляюцца да літаратурных работ намінантаў. Таксама вядучыя далі магчымасць кожнаму з удзельнікаў выказацца, прачытаць некалькі асабістых твораў. Кульмінацыяй мерапрыемства стала выступленне навучэнцаў ДУА “Лідская дзіцячая школа мастацтваў”.

[Admin]

Чытанне ўслых “Паэтычны свет Р.Барадуліна”

З нагоды 85-годдзя з дня нараджэння Рыгора Барадуліна ў філіял “Лідская гарадская біблятэка №4” 19 лютага былі запрошаны вучні 3-х класаў ДУА “Сярэдняя школа №1 г.Ліда” на мерапрыемства “Паэтычны свет Р.Барадуліна” – чытанне ўслых. Рыгор Барадулін пісаў выдатную літаратуру для дзяцей. Дзякуючы народнаму гумару ён набывае сваю адметную індывідуальнасць у дзіцячай паэзіі. Разумна спалучаў свой жыццёвы вопыт з дзіцячай непасрэднасцю, нестандартным вобразным мысленнем. Пад час мерапрыемства прысутныя пазнаёміліся з вершамі пісьменніка і самі прачыталі невялікія яго творы, разгадалі “Загадкі з градкі”.

[Admin]

Дасье пісьменніка-юбіляра І.Навуменкі “Яго кнігі, як лёс краіны”

19 лютага філіял “Дварышчанская сельская бібліятэка” прапанаваў сваім наведвальнікам дасье пісьменніка-юбіляра І.Навуменкі “Яго кнігі, як лёс краіны”. Разам з удзельнікамі сустрэчы супрацоўнік бібліятэкі праслухалі звесткі пра жыццёвы шлях пісьменніка. Цікава было агучыць урыўкі з твораў юбіляра, абмеркаваць падзеі, якія апісвае аўтар і проста паслухаць жывую беларускую мову, якая гучала з вуснаў сучаснай моладзі.

[Admin]

Гутарка “Вайна і сучаснасць”
(да 95-годдзя з дня нараджэння І.Я. Навуменкі)

16 лютага філіял “Гудская сельская бібліятэка” сустрэў наведвальнікаў на гутарцы “Вайна і сучаснасць”, прымеркаванай да 95-годдзя з дня нараджэння І.Я. Навуменкі. Памяць пра ваеннае ліхалецце пісьменнік пранёс праз усё жыццё. Падзеі вайны, гераічная барацьба супраць нямецкіх захопнікаў ляглі ў аснову многіх яго твораў. І адлюстраваны яны на высокім мастацкім узроўні. Зборнікі апавяданняў пісьменніка “Семнаццатай вясной”, “Хлопцы-равеснікі”, аповесць “Вайна каля Цітавай копанкі” сталі яскравай старонкай беларускай літаратуры. Галоўнае пытанне на якое шукае адказ у сваіх творах пісьменнік: а ці можа заставацца чалавек чалавекам у жорсткіх і абсурдных абставінах ваеннага кровапраліцця? Менавіта на гэта пытанне і спрабавалі знайсці адказ усе прысутныя на мерапрыемстве. Раманы І.Навуменкі “Смутак белых начэй”, “Сасна пры дарозе”, “Вецер у соснах”, “Сорак трэці” і сёння служаць высокароднай справе выхавання маладога пакалення.

[Admin]

Выстава “Суровая памяць Афганістана”

15 лютага ў філіяле “Дварышчанская сельская бібліятэка” разгарнулася выстава да Дня памяці воінаў-інтэрнацыялістаў “Суровая памяць Афганістана”. На гадзіну перасцярогі былі запрошаны вучні мясцовай школы. Калі малодшыя дзеці ўважліва слухалі гісторыю ваенных падзей і ім было цяжка ўявіць як гэта было, то старэйшыя наведвальнікі мерапрыемства маглі выказаць свае меркаванні, прывесці прыклады з успамінаў сваіх родных і іх сяброў, лёс якіх быў звязаны з той жудаснай вайной.